Wikisłownikarz:Pioter/brudnopis/Bund lider

די שבֿועה

ברידער און שוועסטער פֿון אַרבעט און נויט
אַלע, וואָס זײַנען צעזייט און צעשפּרייט,
צוזאַמען, צוזאַמען, די פֿאָן זי איז גרייט,
זי פֿלאַטערט פֿון צאָרן, פֿון בלוט איז זי רויט!
אַ שבֿועה, אַ שבֿועה אויף לעבן און טויט.

הימל און ערד וועלן אונדז אויסהערן
עדות וועט זײַן די ליכטיקע שטערן,
אַ שבֿועה פֿון בלוט און אַ שבֿועה פֿון טרערן
מיר שווערן, מיר שווערן, מיר שווערן!

מיר שווערן אַ טרײַהייט אָן גרענעצן צום בונד.
נאָר ער קען די שקלאַפֿן באַפֿרײַען אַצינד.
די פֿאָן די רויטע איז הויך און ברייט.
זי פֿלאַטערט פֿון צאָרן, פֿון בלוט איז זי רויט!
אַ שבֿועה, אַ שבֿועה אויף לעבן און טויט.

וואַכט אויף!

ווי לאַנג, אָ ווי לאַנג וועט איר בלײַבן נאָך שקלאַפֿן
און טראָגן די שענדלעכע קייט?
ווי לאַנג וועט איר גלענצענדע רײַכטימער שאַפֿן
פֿאַר דעם וואָס באַרויבט אײַער ברויט?

ווי לאַנג וועט איר שטיין, אײַער רוקן געבויגן
דערנידריקט, היימלאָז, פֿאַרשמאַכט?
עס טאָגט שוין! וואַכט אויף! עפֿנט אײַערע אויגן!
דערקענט אײַער אײַזערנע מאַכט!

קלינגט אומעטום אין די פֿרײַהייטס־גלאָקן!
פֿאַרזאַמלט די לײַדענדע קנעכט!
און קעמפֿט באַגײַסטערט, און קעמפֿט אומדערשראָקן
פֿאַר אײַערע הייליקע רעכט!

און אַלעס וועט לעבן און ליבן און בליִען
אין פֿרײַען, אין גאָלדענעם מײַ!
ברידער! גענוג פֿאַר טיראַנען צו קניִען
שווערט, אַז איר מוזט ווערן פֿרײַ!

מחבר: דוד עדעלשטאַט

דאַלוי פּאָליציי!

אין אַלע גאַסן וווּ מען גייט
הערט מען זאַבאַסטאָוועקעס
ייִנגלעך, מיידלעך, קינד־און־קייט
שמוסן פֿון פּריבאָווקעס

גענוג שוין, ברידער, האָרעווען
גענוג שוין באָרגן, לײַען
מאַכט אַ זאַבאַסטאָווקע!
לאָמיר, ברידער, זיך באַפֿרײַען!

ברידער און שוועסטער!
לאָמיר זיך געבן די הענט
לאָמיר ניקאָלײַקעלען
צעברעכן די הענט!

היי, היי, דאַלוי פּאָליציי!
דאַלוי סאַמאָדערזשאַוויע וו ראַסיי!

ברידער און שוועסטער!
לאָמיר גיין צוזאַמען
לאָמיר ניקאָלײַקעלען
באַגראָבן מיט דער מאַמען

היי, היי, דאַלוי פּאָליציי!
דאַלוי סאַמאָדערזשאַוויע וו ראַסיי!

נעכטן האָט ער געפֿירט
אַ וועגעלע מיסט
הײַנט איז ער געוואָרן
אַ קאַפּיטאַליסט!

היי, היי, דאַלוי פּאָליציי!
דאַלוי סאַמאָדערזשאַוויע וו ראַסיי!