Aneks:yi/txt/אויפֿן פּריפּעטשיק
אויפֿן פּריפּעטשיק ברענט אַ פֿײַערל
און אין שטוב איז הייס
און דער רבי לערנט קליינע קינדערלעך
דעם אַלף־בית
זעט זשע, קינדערלעך, געדענקט זשע, טײַערע,
וואָס איר לערנט דאָ.
זאָגט זשע נאָך אַ מאָל, און טאַקע נאָך אַ מאָל:
קמץ אַלף – אָ!
לערנט קינדער מיט גרויס חשק
אַזוי זאָג איך אײַך אָן
ווער ס׳וועט גיכער פֿון אײַך קענען עבֿריתּ
דער באַקומט אַ פֿאָן.
זעט זשע, קינדערלעך, געדענקט זשע, טײַערע,
וואָס איר לערנט דאָ.
זאָגט זשע נאָך אַ מאָל, און טאַקע נאָך אַ מאָל:
קמץ אַלף – אָ!
לערנט קינדער, האָט ניט מורא
יעדער אָנהייב איז שווער
גליקלעך איז דער וואָס האָט געלערנט תּורה
צי דאַרף אַ מענטש נאָך מער?
זעט זשע, קינדערלעך, געדענקט זשע, טײַערע,
וואָס איר לערנט דאָ.
זאָגט זשע נאָך אַ מאָל, און טאַקע נאָך אַ מאָל:
קמץ אַלף – אָ!
אַז איר וועט, קינדערלעך, עלטער ווערן
וועט איר אַליין פֿאַרשטיין
וויפֿל אין די אותיות ליגן טרערן
און וויפֿל געוויין
זעט זשע, קינדערלעך, געדענקט זשע, טײַערע,
וואָס איר לערנט דאָ.
זאָגט זשע נאָך אַ מאָל, און טאַקע נאָך אַ מאָל:
קמץ אַלף – אָ!
אַז איר וועט, קינדער, דעם גלות שלעפּן,
אויסגעמוטשעט זײַן,
זאָלט איר פֿון די אותיות כּוח שעפּן –
קוקט אין זיי אַרײַן!